HKTV mall 花幾萬蚊租黎開間冇用既鋪頭? 係米真係咁差先? (●▼●;)

花幾萬蚊鋪租黎開間冇用既鋪頭? 究竟係邊位老闆咁做呢? 原來香港電視係炮台山/北角度開左間 HKTV Mall 實體店。批評不絕，又係米真係咁差先?

一入黎 HKTV Mall 店鋪，第一個印象就係好有新鮮感，係一間智能電子化既店鋪。咁樣既店面設計我相信係全港唯一，真係好令人眼前一亮。兩邊都係 touch screen mon 牆 ，好似有好多部平板 tablet 收埋係入面咁，都幾壯觀架。
 

有分唔同區域如蔬果、零食等，螢幕會好似 slide show 咁不停播放唔同產品，琳瑯滿目。一按螢幕就可以停止播放，細心睇產品介紹，或者睇其他產品，感覺就好似平時用部手機/平板上網購物睇心水產品。不過當你揀左件想買既，期望即刻俾錢攞貨呢，咁諗實在係太天真啦。因為你係唔會揾到「付款」或者「購買」按扭架，我都揾左陣，但部機就成日彈返上上一頁。見到顧客咁徬徨，熱心既店員都會行過黎叫我地 download HKTV 既手機 app，login 返個 account，再係 app 入面禁個產品然後網上俾錢，然後再等多幾日先送貨上門。所以即使拍攝當日間鋪都算多顧客，我依然可以輕鬆無阻檔咁影幅平板牆，因為個個都圍住係個 counter 度詢問店員。不過啲店員的確好好人，好有耐心咁教顧客點用個 app 同介紹 d 優惠。
  
sorry 以上杯麫同罐頭湯都係非賣品><

你可能會諗，下? 咁大間鋪就係得D 平板牆，完全冇實體野賣? 咁又唔係，其實行入啲係 counter 後面會有幾個冷凍，賣凍肉同急凍食品等，都多人迫係條走廊仔睇架，呢啲就真係見到就即 pay 即刻攞返屋企。不過食材的確有限，同埋我行多幾步都到百佳超級市場啦。

HKTV 店鋪玩平板牆呢個概念的確好耳目一新，不過大家行街都係為左即買即拎返屋企架啦，擺幾十塊平板出黎但冇得即時買，咁不如我自己係屋企度篤手機 app 買仲好，唔使攞黎鋪頭。感覺上佢咁樣開鋪真係完全計入 marketing expense，只係為左宣傳個 HKTV mall app…不過真係多人用左既。小編都曾經係HKTV mall 個網買過野，係好方便，產品種類多，尤其是日韓宵夜零食真係值得一讚。不過不論你係屋企上網買，定企係 HKTV實體店度用個 app 買，都係買滿 400 蚊先可以免費送貨…否則要另加差唔多一百蚊運輸費。對於平日較忙，習慣一個星期先去超市買野既人黎講，每次最低消費 $400 都可接受既。

其實可以更好利用而家 HKTV mall 實體店既，例如整啲會員卡，係平板牆見到心水既產品就可以即時拍卡比錢，方便一啲唔太識用 HKTV app 既顧客。而且最低消費係 $400 的確好貴，否則要比高昂既運輸費；不如係鋪面拍卡買野，可以唔使買滿 $400 都可以係鋪頭攞貨，降低購物門檻會吸引好多。

(btw 好難係咁多人面前同間鋪影相 -V- 啲店員都望住了…)

** 筆者呀粗是個喜歡研究電腦硬件, 尤其是網絡的90後香港IT 女生
若果喜歡女生寫的電腦產品開箱文評測，好app 介紹，或者想知道有甚麼產品優惠
請 like Cyubi Network 超必網絡 Facebook page，謝謝支持 
https://www.facebook.com/cyubinetwork/